الاثنين

بالالـــــوان !


بتفكرينى بالشروق
بالشمس طالعه تطرد الاحزان
ونورها الدهبى
بيخبط على الشبابيك
جمالها يبان
شرقت عنيكى فى سكتى
جمال الفرحه فى عنيّا اتولد
وقفلتى على خوفى البيبان

يا طعم الضل
وسط الصحرا فى اغسطس
يا لون الارض
بعد المطره فى يناير
هُداكى طل على قلبى اللى كان حاير
لقاكى كل شىء فى الكون
بقى يشوفك..
براءة ف ضحكة الاطفال
وحريه ف جناح طاير
وفرحه كبيره فى عيون ام
رجعوا ولادها مالغربه

بقى يشوفك..
دفا ف الحُضن بين الجد واحفادُه
طيابة جوّه عين مصرى
ووقت الشده فى عنادُه

سَكَنتى كل شىء فيّا
حروف اسمك
بقت محفوره فى ملامحى
وزى الوشم على قلبى..مايتشالشى
رسمت ملامحك الصافيه
و كانت نور
بيمحى عتمة الغربة
بنظرة عينك الدافيه
ده قبلك قلبى كان بهتان
ك كل الدنيا فى عنيّا
ما بهتانه...
لوحدك بس بالالوان !


mar3i